കണ്ണന്‍ കരടി

കുട്ടി: കൂടാരത്തിൻ പിന്നിൽ കൂട്ടിൽ
കൂനിക്കൂടിയിരിക്കുന്നാര്?
കരടി: കണ്ണറിയില്ലേ, കാണുന്നില്ലേ?
കണ്ണൻ കരടിയെ നീയറിയില്ലേ?
കുട്ടി: അയ്യോ! കണ്ണാ എന്തു പിണഞ്ഞു?
വയ്യാതാവാനെന്തൊരു കാര്യം?
കരടി: വയ്യാതായി വയസ്സൊരുപാടായ്
കയ്യും കാലുമനങ്ങാതായി.
കുട്ടി: ലക്ഷണമാകെക്കണ്ടലേതും
ഭക്ഷണമില്ലെന്നല്ലോ തോന്നും!
കരടി: വിരുതുകൾ കാട്ടാൻ വയ്യാതായി
ഒരുവക തിന്നാൻ നൽകാതായി.
കുട്ടി: കഷ്ടം! കാര്യം കാണാൻ കേമൻ
മർത്യനു പണ്ടേ സ്വാർത്ഥത കൂടും!

രണ്ടു കുട്ടിപ്പാട്ടുകള്‍

സ്വന്തം കാര്യം! 

പെപ്പരപെരപെരപേരപ്പാ ഞങ്ങടെ തെങ്ങേക്കേറല്ലേ

അങ്ങേത്തൊടിയില്‍ക്കേറിക്കോ

തെങ്ങിന്‍ മടലു പെറുക്കിക്കോ!

കുക്കുടുകുടുകുടുകുട്ടപ്പാ

ഞങ്ങടെ മാവു കുലുക്കല്ലേ

നിങ്ങടെ മവേല്‍ക്കേറിക്കോ

മാങ്ങ പഴുത്തതു വീഴ്ത്തിക്കോ!

കൊക്കരകൊരകൊരകോരപ്പാ

നിങ്ങടെ കണ്ടം പൂട്ടണ്ട

ഇങ്ങേക്കണ്ടം പൂട്ടിക്കോ

ഞങ്ങളു നെല്ലു വിതച്ചോളാം

അനങ്ങാക്കള്ളന്‍

തൂമ്പയെടുക്കെട കുട്ടപ്പാ

നാളെയെടുക്കാമെന്റപ്പാ

പറമ്പു കിളയ്ക്കെട കുട്ടപ്പാ

പാമ്പു കടിക്കും വയ്യപ്പാ

കപ്പ നടാമെട കുട്ടപ്പാ

ഇപ്പഴെ വേണ്ട വരട്ടപ്പാ

വളമിടുവാന്‍ വാ കുട്ടപ്പാ

വളമതു നാറും വേണ്ടപ്പാ

പുല്ലു പറിക്കെട കുട്ടപ്പാ

മുള്ളുതറയ്ക്കും വേണ്ടപ്പാ

കപ്പ പറിക്കെട കുട്ടപ്പാ

അപ്പനു വയ്യേല്‍ വേണ്ടപ്പാ

കപ്പ നുറുക്കാം കുട്ടപ്പാ

അപ്പിടി മുറിയും കയ്യപ്പാ

കപ്പ പുഴുങ്ങെട കുട്ടപ്പാ

അപ്പണിയറിയില്ലെന്റപ്പാ

***

കപ്പ പുഴുങ്ങിയതെങ്ങപ്പാ?

അപ്പിടി തിന്നെട കുട്ടപ്പ

പഞ്ചവാദ്യം

ഠൂം ഠൂം ഠൂം ഠുമിടയ്ക്കയിടഞ്ഞു

അക്കിടകിടകിട തിമിലപറഞ്ഞു

ഇമ്പമ്പളപള മദ്ദളമോതി

പെപ്പരപെരപേ കൊമ്പു വിളിച്ചു

ഇഞ്ചിഞ്ചിഞ്ചമിലത്താളത്തില്‍

അഞ്ചും ചേര്‍ന്നുടനെന്തൊരു മേളം!

കാക്കക്കൂട്‌

"കാക്കക്കുഞ്ഞേ വീടെവിടെ?"

"വീടല്ലുള്ളതു കൂടല്ലേ?"

"നിന്നുടെ കൂട്ടില്‍ മുറിയെത്ര?"

"ഉള്ളതു ചെറിയൊരു കുഴി മാത്രം"

"കട്ടിലു തേക്കിന്‍ തടികൊണ്ടോ"

"കിട്ടിയ ചുള്ളികള്‍ കൊണ്ടാണേ"

"ഇല്ലേ മെത്തയതിന്നുള്ളില്‍?"

"പുല്ലും നാരും വൈക്കോലും."

പട്ടി കടിക്കും... സൂക്ഷിക്കുക!

കിടക്കുന്ന പട്ടിക്കടുത്തൂടെയോടി-

ക്കടക്കൊല്ല ചാടി പിടിക്കും കടിക്കും

കടിക്കുന്ന നായെ കുടക്കാലുകൊണ്ട-

ങ്ങടിക്കൊല്ല ചുമ്മാ കുടക്കാലൊടിക്കും